政情：曾智明嘗太空餐 一試即停口
參加中華總商會「少年太空人體驗營」九天團嘅三十位中學生已返抵香港。尋日齊穿航天服現身太空館，中總副會長曾智明（Ricky）親自迎接。講到太空體驗，原來Ricky早喺五年前已初嘗太空餐，可惜味道唔係好啱佢胃口，拆開一包試味後就停手。
因為佢爸爸曾憲梓捐助唔少航天事業嘅關係，Ricky同幾代太空人老友到極，價值逾百萬元人民幣嘅航天服，佢都試着過，但講到最難忘體驗，當然係食太空餐。話說○九年佢收到有關單位寄來一盒 「太空全餐」，內裏有飯有肉有蔬菜，但菜式經過特別處理，分別裝入特製包裝袋內。
Ricky急不及待拆開其中一包，發現蔬菜已被抽乾水分，外形似足涼果。味道係點？佢笑笑口話：「總知好特別。」因為呢種「特別」感覺，剩低嘅幾包餸，佢亦無再食。不過Ricky強調，嗰啲係第一代太空餐，時移世易，製造太空食品嘅技術已大有改善，依家太空人食嘅飯，會似米糕咁，味道唔錯喎。