政情：「挺林」 失敗 律師會捉內鬼

白皮書事件 處理惹不滿

有知情人士話，律師會只有約九千名會員，前晚足足有近四千人投票，投票率高達四成幾，都算係好厲害。睇番三個動議，「挺林」陣營得票都唔夠四成，對比以往立法會法律界功能界別選舉，代表律師會嘅候選人都有多過四成票，加上今次冇咗大律師票源，坦言結果係「意料之外」，難怪原本胸有成竹嘅「挺林」陣營得知投票結果時好唔開心，相反提出罷免嘅律師任建峰（Kevin）就講到喊晒口，好似沉冤得雪咁款。

另一名知情人士解釋，今次有好多年輕人出來表態，就算有人幫Ambrose拉票，班年輕人講到明唔賣帳，因此就知道「冇得玩」。不過，今次能夠通過三項動議嘅最大因素，最致命傷唔係班年輕人團結表態，而係有部分以前公開支持過Ambrose嘅人倒戈，有傳佢哋私底下好不滿Ambrose，有啲人更可以喺票源上左右大局。知情人士又話，其實好多律師未詳細睇過白皮書，今次之所以「反林」，主要覺得Ambrose處理白皮書事件唔係太好。

倘不請辭 恐累理事會

律師會理事會下星期二就會開會，商討點解決通過不信任會長嘅爛攤子，如果Ambrose唔自行請辭，隨時累死成個理事會。有分析指，論資排輩，會長走人應該係副會長頂上，而兩位副會長熊運信（Stephen）及蘇紹聰（Thomas）之中，又以Stephen資歷深啲。有人形容，Stephen冇政治方面嘅能力，呢類人正正係依家需要嘅，睇嚟呢個燙手山芋，佢都係預咗冇得推走喇。