專科醫生：X光非100%準確
【本報訊】從肺部X光片能及早發現末期肺癌？臨床腫瘤科專科醫生張文龍指出，X光片並非百分百準確，若腫瘤位於左邊橫隔膜上方，有可能與心臟血管陰影重疊而混淆，因此肺片正常不代表必然無恙，「若要事後回看，係咪腫瘤好大好明顯？無可能睇唔到？係咪走漏眼？可能要等將來有追討或審訊，由獨立第三方專家去評估。」
評估須依賴病歷等資料
他又指，負責簽發X光報告的放射診斷科醫生不會面對病人，他們評估X光肺片是否有可疑時，十分依賴診症醫生提供的資料如病人病歷、臨床表徵等，「最初的醫生轉介病人去照X光時，初步診斷係乜？會唔會有其他徵狀誤導咗佢？如果係掉番轉，個病人係咁咳、呼吸困難、持續胸悶胸痛，咁都仲單靠一張肺片斷定個肺有事定無事，無做其他跟進，就可能出現問題。」
放射科專科醫生陸永恆不評論個別個案，但亦指單憑肺部X光片，難以完全肯定或排除患肺癌的可能性，因肺部有不少「盲點」，例如被心臟或血管遮掩位置，「個肺至少有三成地方唔能夠完全睇清楚」，最準確方法是電腦掃描（CT），但輻射量較X光高二、三百倍，也不能安排每名病人也做CT。因此，診症的醫生必須結合放射科報告、臨床徵狀及病歷作出判斷，放射科報告對診斷確有影響，但未必是決定性因素。