政情：公民講場：挽垃圾徵費奶爸當救「星」

我哋尋日啱啱寫過，環境局局長黃錦星（星星）領導嘅環保問責團隊，上任後屢次甩碌，經常要人出手相助，其中早前嘅擴建堆填區爭議，就要官場「奶媽」政務司司長林鄭月娥幫手擺平，另一極具爭議性嘅垃圾徵費問題，就一直靠「奶爸」可持續發展委員會主席陳智思向公眾推銷。陳智思尋日接受電台訪問時，再暗批星星唔夠政治能量，強調垃圾徵費不單係環境局工作，其他部門亦要配合執行，包括食環署同房署等，因此建議應由港府高層負責牽頭。睇嚟呢位「奶爸」湊黃錦星都湊得好辛苦，因此要再搵多啲人幫手。