政情：廢鑊擾民 企業嬲爆
「翻閹」做平等機會委員會（平機會）主席嘅「廢官」食物及衞生局前局長周一嶽（周一鑊），最近好大喜功，勞師動眾檢視現行四條歧視條例，雖然公眾諮詢期未結束，但諮詢文件中提出好多意見，例如建議探討係咪將「事實婚姻」納入保障，就辣慶唔少工商界。有商界人士直言對周一鑊非常不滿，質疑佢有好權之嫌，為咗滿足自己嘅權力欲，令平機會權力不斷膨脹，不惜顛倒曲直，攪亂天下，認真不可思議咁話喎。
睇完諮詢文件好不滿
最近平機會檢視的包括《性別歧視條例》、《殘疾歧視條例》、《家庭崗位歧視條例》同《種族歧視條例》，並建議將呢四條條例合而為一。商界人士最近睇過諮詢文件，覺得太過分，不吐不快。例如文件中提出建議探討係咪將「事實婚姻」納入《性別歧視條例》，以保障有事實婚姻嘅人免受歧視，但其實香港現行嘅婚姻法例中，根本無界定同包含事實婚姻，即係事實婚姻並無法律基礎。
如果上述建議獲得通過，咁企業就大鑊喇！例如好多公司都會請員工及家屬去旅行，如有人同佢嘅同居人未結婚註冊，公司又點證實佢哋嘅事實配偶關係呢？又或者有花心員工有多名男／女友，每幾日就一齊住一、兩晚，佢哋都視對方為配偶，咁公司係咪要請埋咁多人一齊去旅行呢？呢啲建議真係好荒謬，唔止睇到大家矇查查，簡直係唯恐天下不亂。
擔心誤聘騙徒呃賠償
仲有一樣嘢令到商界好頭痛，就係將《性別歧視條例》中原本只保障顧客免被性騷擾，反向擴大保障員工免被顧客性騷擾。商界擔心未來或有機會聘用到職業騙徒，夾埋朋友扮被性騷擾以向僱主呃賠償金。一句講到尾，香港依家營商環境咁差，美國又可能加息嘅情況下，周一鑊仲搞埋啲擾民工程，唔通佢係想藉此打壓商界，搞到大家雞毛鴨血，咁先至顯得自己好有權勢？又或者佢驚大家忘記佢嘅存在？