中環出更：防範伊波拉 商界靠自救
喺西非失控的世紀疫症伊波拉疑似襲港，全城人心惶惶，雖然最終證實係虛驚一場，但係港府至今仍未宣布防疫措施，商界一於自救防患未然。中華廠商聯合會副會長陳淑玲（Shirley）話，已喺旗下時裝連鎖店提供洗手液，呼籲員工同客人勤洗手。副會長李秀恒（Eddy）直言廿年前已開始同尼日利亞做生意，疫情爆發後唔會斷絕同當地通商，但傾生意時會戴口罩及避免握手。
廠商會尋日為推出電視特輯搞宣傳騷，話題離不開伊波拉驚魂。非洲市場巨大，唔少港商都喺東非經營鞋廠或製衣廠。Shirley話，疫情現階段只影響西非，故暫時未收到受影響個案。但佢已打醒十二分精神，叫員工注意個人衞生，加強店內消毒。
與非洲做生意 唔驚得咁多
Eddy就自爆同「非商」打交道多年，廿年前已賣錶畀尼日利亞，伊波拉喺西非大播毒後，佢坦言唔驚得咁多：「唔少非洲水貨客定期嚟香港買手錶及電子產品，兩地交往頻繁，點禁得咁多？」
副會長吳宏斌都同埃塞俄比亞關係密切，佢係該國駐港名譽領事，多年前已進口當地咖啡豆喺香港銷售。佢直言以往不時飛往當地買貨，但近年業務轉型，打個電話落柯打就得，所以非洲爆發疫症都唔太擔心，期望疫情盡快平息。
講番個活動係廠商會八十周年慶祝節目之一，共將推出十多集電視特輯，讓港人重溫香港工業界光輝歲月，了解港商如何面對挑戰。副會長吳永嘉亦粉墨登場細數工展會發展歷程，佢自爆為咗上鏡更靚仔，又搽粉又畫眉，但一畫眼線就狂流眼水，後來索性唔畫喎！
卓妮