《聖經》記載，上帝創造天地萬物嘅時候，話有光就有光，話有水就有水。嗱，上帝就話擁有呢種無中生有嘅能力啫，之但係如果「民意」都可以無中生有，市民「被發聲」而不自知，咁就非常大鑊嘞。
唔係危言聳聽o架。城規會早前就何文田一幅休憩用地改變用途嘅申請進行公眾諮詢，點知被本報踢爆有人涉嫌製造假民意。有市民最近收到城規會嘅確認信，話收到佢母親就改劃一事提出意見，其實老人家從未發表過意見，懷疑個人資料被盜用，於是向城規會投訴。
冒名炮製假民意已經離譜，更離譜嘅係當局接獲投訴後竟然當冇事發生，仲話「好多人係咁」，叫當事人唔使擔心喎。咁就奇嘞，既然「好多人係咁」，即係話可能存在大規模、有組織嘅偽造民意行為，當局咁都闊佬懶理，你話係咪離譜吖。
喂，盜用他人身份涉及刑事罪行，唔係講玩o架。聽吓法律界人士點講喇，今次事件涉嫌有人觸犯《個人資料私隱條例》，以及行使偽造文書等罪行，最高可判監十四年，如果從中獲益咯喎，更有可能干犯訛騙罪。既然「好多人都係咁」，即係話問題好嚴重，城規會點可以輕輕放過o架？
係人都知，香港土地資源彌足珍貴，好似何文田呢幅地咁吖，可提供一幢約一千二百個宿位嘅十八層高宿舍，以及一所十三層高大樓，涉及巨大利益，難保唔會有人製造對自己有利嘅「民意」。須知道，城規會諮詢並唔係茶客圍埋吹水，對土地最終用途有決定性影響，事關重大o架。遠嘅唔講，就講位於九龍塘嘅前李惠利南面地皮，之前曾打算改為住宅用途，最終因為社會人士大力反對，城規會舊年經公眾諮詢後，決定還原為社區用途，民意嘅影響力可見一斑。
所以話，當局對市民「被發聲」視而不見，唔止等於鼓勵製造假民意，而且等於鼓勵市民以身試法。有立法會議員擔心有財團、利益團體鋌而走險，集團式造假，發動民意攻勢，令規劃決定受到影響，唔係杞人憂天o架。
講到呢度，功夫茶有兩點質疑，第一，如果唔係本報將事件曝光，仲有幾多偽造民意事件被掩藏？城規會以往嘅諮詢到底有幾多水分？第二，唔少過氣高官幫發展商打工，背後有冇涉及延後利益？正如當年嘅梁展文事件，或者好似「民主阿婆」陳方安生收取淫賤黎黑金，都係水洗唔清o架。點講都好喇，唔該發展局拿拿臨徹查事件，堵塞漏洞，否則隨時又爆大鑊o架！