政情：自嘲「路人甲」 鄺志堅退政壇？
久未露面嘅前立法會勞工界議員鄺志堅（鄺大狀）尋日現身一個聯署活動，同工聯會黨友陳婉嫻（嫻姐）等人爭取尋求共識，實現特首普選。不過，鄺大狀在活動完結後走都走唔切，對普選期望唔肯多講兩句之餘，仲自嘲只係「路人甲」，着我哋有咩就問身旁嘅嫻姐喎，六十歲都未夠嘅佢更自爆準備退出政壇添。
「生意唔好 摺埋間公司」
鄺大狀自從卸任議員後，除咗自立門戶做政治顧問，專責為建制派新人抬轎外，早兩年更應徵過勞工及福利局副局長，早前仲講緊計劃為立法會選舉培訓工聯會新星，百足咁多爪。但最新消息係鄺大狀原來打算退休，仲自言已脫離政壇，更準備摺埋間顧問公司，現時只係路人甲一個。
至於點解連間顧問公司都唔要，大狀只係笑言「生意唔好囉」，係咪政界冇人搵佢幫手呢？佢貫徹「路人甲」嘅身分，一個箭步就極速行開咗，講多兩句都冇。大狀先後辭任工聯會法律顧問同最低工資委員會勞方代表，退隱江湖唔係冇先兆。