政情：許華傑遭騙徒冒名呃錢
電話騙徒無處不在，香港中華出入口商會副會長許華傑（Michael）亦被人「擺上枱」，佢早前身在黑龍江自家牧場度假期間，遭騙徒冒充呃錢，騙去友人八千元人民幣，即約一萬港元。
黑龍江自家牧場度假
中招嘅係Michael媽媽喺黑龍江嘅好友，呢位好友日前收到一名操廣東口音嘅男子來電，聲稱係「許華傑」本人，因在當地辦事時欠八千元人仔，要求「入住錢先」，雖然友人與Michael只有兩面之緣，仍然仗義相助，爽快入錢。
騙徒食髓知味，翌日再致電話「唔夠錢」，要求入多二萬元人仔。友人愈諗愈唔妥，致電Michael母親求證時，才知墜入騙局，馬上報公安。遭人「冒名」冒到去黑龍江，Michael大感無奈，安慰受騙友人。話雖如此，財到光棍手，睇怕筆錢都凍過水。Michael隨即在社交網站留言，呼籲好友唔好中招，仲上載林姓騙徒全名及銀行戶口號碼。佢又質疑騙徒如此了解佢同親友，可能是熟人所為，以後會加倍小心處理電話簿。