政情：收唔收肥佬黎捐散紙?學民避答
自從機密文件爆出壹傳媒老闆肥佬黎嘅政治捐獻醜聞後，唔少泛民主派人士都聞風喪膽，呢股政治獻金風暴，最新已殺到一去眾社運團體身上。成立短短兩年嘅學民思潮鋒芒太露，自然首當其衝，但佢哋隨即劃清界線，自爆從未收過肥佬黎任何捐款，仲話唔接受任何巨額捐款，就算肥佬黎過數落佢哋戶口，都會歸還。不過，被問到肥佬黎將巨額捐款唱成散紙畀學民思潮又會點呢？連召集人黃之鋒都不置可否。咁究竟有冇收過肥佬黎啲散紙捐款呢？
吸金三百萬 惹人猜想
政治獻金大醜聞愈揭愈臭，有人死撐無收過錢，有人就側側膊話自己只係「代收」，總之出盡法寶解釋死撐。呢單醜聞中，雖然學民思潮未涉及政治獻金醜聞，但唔知係咪聞到陣臭除，有學民成員最近自行公開財政紀錄。不過，勢估唔到原來呢班學生哥兩年內已經成功「吸金」約三百萬元，籌款成績好過唔少泛民政黨，但亦因為呢個原因，令部分人懷疑呢三百幾萬元捐款中，到底有無包括肥佬黎捐款。
面對呢個質疑，黃之鋒接受傳媒訪問時透露，原來學民仔過去一直只接受市民小額捐款，從來唔接受巨額捐款，所以斬釘截鐵話無收過肥佬黎錢，亦無收過其助手Mark Simon嘅錢。佢仲話，如果肥佬黎過數落學民思潮銀行戶口，佢哋知道後會即刻會過返數畀肥佬黎喎。不過，被問到如果肥佬黎將幾千萬元「唱散」，然後入落學民思潮籌款箱，咁佢哋又收唔收呢？
長毛棄公司化 有古怪
黃之鋒面對呢條問題都不置可否，只係重申唔會接受巨額捐款，因為唔想被人感覺學民思潮被某某人士操縱。咁即係點？唔通有人唱散啲捐款就會收？如果肥佬黎在過去嘅遊行捐咗好多「散紙」畀佢哋，佢哋係咪都當係市民小額捐款呢？睇嚟佢下次要答得再清楚啲，先能夠釋除市民疑慮嘞。我哋尋日嘗試致電向黃之鋒查詢，但佢未有回覆。
學民仔主動披露帳目，但已捲入政治獻金醜聞嘅社民連立法會議員梁國雄，就再被揭發去年靜靜雞將「社會民主連線有限公司」清盤，然後將社民連轉為社團形式營運，由於有限公司需要被認可核數師睇數，又要向稅局報稅，無論手續定文件都比社團複雜得多，令人懷疑社民連係咪帳目不清有古怪，先要咁做。我哋亦致電向梁國雄查詢，但同樣未有回覆。