中環出更：社交網被「滅聲」 大聯盟求助議員
泛民主派同建制派就政改問題不斷在網上平台宣傳本身政治主張，甚至出現網絡欺凌。由八個團體組成嘅「facebook版主反滅聲大聯盟」，繼去美國領事館投訴其facebook（fb）專頁被無理刪除後，尋日就約見立法會資訊科技界議員莫乃光（Charles）同體育、演藝、文化及出版界馬逢國，要求對方跟進事件。
搵馬逢國莫乃光幫手
大聯盟發言人劉轉好話，近月有泛民評論員在網上呼籲泛民支持者用集體投訴嘅方式癱瘓佢哋嘅fb專頁，令fb管理員強制刪除佢哋多個發帖，認為對方咁樣嚴重威脅言論同網絡自由，要求兩位議員積極介入事件，保障網民自由表達意見嘅權利。
馬逢國話，初時都唔明大聯盟點解會搵佢幫手，諗咗好耐先醒起自己係資訊科技及廣播事務委員會委員，於是就聽吓佢哋有乜訴求。Charles就投訴自己都試過在微博發表「佔中」言論，同樣被管理員強制刪帖，講笑話既然網民去美國領事館抗議，佢可能都要去中聯辦請願喎！
卓妮