中環出更：名人作家分享閱歷
每年書展都吸引唔少港人入場掃書，但熱潮過後，好多時都將啲書擺埋一邊封塵。為咗推廣優良閱讀風氣，香港流行圖書出版協會尋日特意舉行首屆「香港金閱獎」選舉，仲邀請港大專業進修學院院長李焯芬、天文台前台長林超英、元朗區議員鄺俊宇（Roy）等作家出席開幕禮，並向台下觀眾分享成為作家嘅心路歷程同閱讀心得。
李焯芬喺後生時曾經攞過青年文學獎冠軍，寫作功力深厚，但佢並無寫小說，而係寫小品故事。佢話因為都市人生活太忙，分分鐘幾個月都未睇得晒一本書，如果改以小品形式寫故事，讀者好快就可以睇完一個故事，領略當中大道理。除咗寫作外，李焯芬多年來亦閱書無數，佢話除咗鍾意睇古代文化史及人類文明史等冷門書籍外，對三、四十年代嘅文學作品亦情有獨鍾，當中尤其鍾意睇張愛玲同茅盾嘅小說。
林超英小學讀三大名著
至於林超英自小就係愛書之人，讀小學時已經睇咗四大名著中嘅其中三本，剩番《紅樓夢》未睇。喺佢耳濡目染下，大仔都咁鍾意睇書，覺得無咁易變成井底之蛙。雖然佢鍾意睇書，但原來當初無諗過成為作家，只係九四年某日有出版社突然搵佢出書，咁就無啦啦進身作家之列。自此佢開始愛上用文字同讀者分享內心世界，至今仲出咗五本書，多數有關大自然。
新晉作家Roy年初將早前喺網上發表嘅愛情短篇小說結集出版，初版短短幾日內就賣斷市，書展期間出版嘅第二本愛情小說亦要五度加印，對出道唔夠一年嘅作家嚟講算係幾成功。Roy話今年目標係要喺年底前再出一本小說，令更多讀者睇到佢寫嘅故事。
卓妮