政情：行管會為毓民開特會
立法會行政管理委員會（行管會）每月只會召開一至兩次會議，但早前財務委員會審議新界東北發展前期工程撥款期間，行管會每隔幾日就開一次會，討論立法會大樓嘅保安安排。隨住事件終於可以告一段落，行管會都無乜再開會，之但係尋日下晝又突然召開特別會議，莫非今次又有大事發生？
收匿名投訴及電話滋擾
據知情人士透露，行管會今次特別會議係要處理黃毓民嘅投訴。首先毓民去信立法會主席曾鈺成，話收到匿名投訴，指在上月二十號夜晚財委會開完會後，有人要求三至四個立法會保安企喺佢架車附近，企圖阻止佢揸車離開，目的係等主席吳亮星同其他建制派先行離開立法會，認為有關保安行為係違反《立法會（權力及特權）條例》。
之後毓民又投訴其議員辦公室近日不斷收到滋擾電話，來電者仲用粗口辱罵佢，要求行管會同意佢報警及授權警方進入立法會蒐證，行管會委員尋日經討論後同意毓民就事件報警。秘書處亦證實收到有關信件，話行管會將盡快處理，暫時不便評論。