政情：政總圍欄趁亂趕建
行政署上星期突然宣布關閉政府總部東翼廣場進行加建圍欄工程，人權組織同示威團體鬧爆工程係想阻止示威者去政總示威，又批評政府企圖以高牆隔絕民意。據聞政府同行政署一早已經想為政總「公民廣場」加建圍欄，只係一直以來苦無機會，適逢早前反對新界東北發展嘅示威者暴力衝擊立法會，加上立法會放悠長暑假，行政署署長蔡潔如於是博亂乘勢「出貨」，加建圍欄以增強政總保安。
政府怕無險可守
有政府官員透露，其實行政署早有計劃在東翼廣場加設圍欄，皆因經歷過兩年前反國民教育及去年免費電視發牌風波，數以萬計示威者包圍政總，行政署深深感受到政總位置太過空曠，猶如無掩雞籠，根本無險可守。如果每次示威都只係單靠警察同保安維持秩序，只會被人質疑政府浪費警力，加上一旦出現衝擊場面，在場嘅警察同保安可能會受傷。所以思前想後，有政府中人建議行政署倣效位於上亞厘畢道嘅舊政總咁加設圍欄，日後示威者只能在申請後才能入內集會，大大減低出事嘅機會。
工程只需一個月
不過，據聞蔡潔如諗唔到用咩理由話要加設圍欄，於是等咗足足大半年，遇上反對新界東北發展示威者用暴力企圖闖入立法會，主席曾鈺成要聘請顧問公司諗計加強大樓保安，再加上立法會休會放暑假兩個月，議員紛紛出埠去旅行，蔡潔如即時拍板封閉廣場起圍欄，博立會復會後米已成炊，議員就算鬧爆都改變唔到事實。
議員涂謹申預料到政府有此一着，日前就去信要求保安事務委員會召開特別會議，討論事件對公眾集會及遊行嘅影響。鑑於大部分議員已經放暑假離港，令佢嘅如意算盤打唔響。秘書處尋日去信各委員，話由於多數委員唔同意在暑假舉行特別會議，但就同意在新會期首次會議上討論事件，所以委員會決定放埋暑假後先再算。不過，相關工程只係需時約一個月，暑假結束前一定可以完工，所以立法會在暑假後復會再討論都係嘥氣。