政情：中環出更：仁濟女神單車鐵人
仁濟醫院海外學生會日前喺荃灣一間酒樓舉行長者活動，一眾名人子女趁暑假落手落腳做香蕉蛋糕兼派福袋畀長者，副主席嚴徐玉珊、總理孫蔡吐媚及鄭李華熙都同子女一齊出席，今年新加入仁濟嘅總理兼紀惠集團副主席廖偉麟表妹湯振玲（Jacqueline）亦現身。咪睇Jacqueline咁纖瘦靚女，其實佢好鍾意戶外運動，早前踩單車成功挑戰台灣公路最高點武嶺，相信唔少男士都自嘆不如。
Jacqueline笑笑口話，佢迷上踩單車兩年幾，屋企人就擔心兩年幾，其實只要做足安全措施，踩單車係好安全嘅運動。
今年踩上台中武嶺
好多單車迷都鍾意去台灣玩，佢亦唔例外，去年參加咗環台遊，今年就由台中埔里踩上三千二百幾米高嘅武嶺，期間遇上大雨，極具挑戰性，小妮子用咗六小時踩上清境農場，再用四小時踩上武嶺，稱得上係女鐵人。雖然過程好辛苦，但係相當有成功感。
講番當日長者活動，出席嘅海外學生包括嚴太細仔Jeffrey、孫太兒子Eric及鄭太愛女Sheryl，其中Jeffrey係今屆學生會主席。
名人子女暑假做義工
嚴太話，兒子啱啱放暑假回港，希望藉此機會培養阿仔嘅責任感及關心社會。佢感嘆話，依家年輕人太過自我，諗嘢都係為自己利益出發，所以佢好鼓勵子女參與慈善活動。唔講唔知，嚴家大仔嚴子杰及囡囡嚴紀雯都做過海外學生會主席，依家連細仔都做埋，加上佢丈夫嚴玉麟係仁濟醫院前主席，即係全家都係仁濟人，認真有心。
卓妮