疊床架屋，浪費公帑，講到呢啲官僚陋習，西九文化區都算係表表者咯。嗱，當初為咗管理西九，港府成立西九管理局，今日為咗管理西九M+博物館，又話要設立一間全資附屬公司，架構不斷膨脹臃腫，開支不斷上升浪費，咁搞法，納稅人識印銀紙都唔掂喇。
立法會監察西九計劃嘅小組委員會尋日討論M+博物館最新進展，多名議員擔心管理公司會變成獨立王國，自把自為，獨行獨斷，變成另一隻尾大不掉嘅官僚怪獸。而港府就解畫話，同意設立全資附屬公司，由內行人管理M+博物館，強調一切人事及財政有機制監管，唔會形成獨立王國喎。西九行政總監連納智亦誓神劈願，話由於M+博物館具有代表性，需要專人謀劃發展，所以至建議以獨特架構管理，西九其他設施如戲曲中心等展館，唔會有樣學樣咁話。
聽住先喇，當年港府提出西九文化區計劃，夠拍晒心口話唔會超支喇，依家咪一樣承諾落空，成個項目變咗無法填平嘅財政黑洞。講到監管咯喎，就更加不堪提，西九管理局內部管理混亂，烏煙瘴氣，自己都其身不正，點樣監管博物館管理公司吖。咪畀功夫茶睇死，敷衍塞責係港產官僚不變嘅陋習，管治無能係西九管理局無法扭轉嘅命運，如果博物館管理公司真係設立，遲早變成另一個獨立王國嘅咋。
講起真係好笑，港府施政無嘢叻，最叻就係疊床架屋，浪費公帑，催生一個個中睇不中用嘅管治花瓶。先唔講西九管理局吖，好多公營機構同樣大而無當，胡混度日。平機會、私隱專員公署、機管局、旅發局、考評局、生產力促進局，有邊個成立時唔係講到天花龍鳳吖？又有邊個唔係醜聞百出，添煩添亂吖？市民對呢類窩囊混帳嘅官僚衙門已經忍無可忍，實在唔想再多一個無王管嘅怪胎囉。
咁講喇，有用就係幫手，冇用就係廢物，如果設立管理公司可以將M+博物館打理得井井有條，納稅人就算要花少少錢亦唔係問題，問題係西九管理局過往劣迹斑斑，實在令人難以投下信心一票吖嘛。就講財政管理吖，舊年揮金如土買入一千五百件藝術品，平均每件三百幾萬，被本地藝術界質疑物非所值，亂使冤枉錢。至於人事管理咯喎，更加笑話百出，單係前行政總裁謝卓飛上任僅五個月即詐病辭職，將當局玩到陀陀擰，已經足以成為藝術界經典喇。港府叫西九管理局監管博物館管理公司，即係叫包尾大幡教新同學仔做功課，咪搞笑喇。
一句講晒，西九爛攤難收拾，獨立王國床疊屋。其實，港產官僚自己不學無術，學乜嘢人搞文化區吖，計功夫茶話齋，M+博物館不妨考慮另樹一幟，以藝術手法嘲諷港府十年如一日嘅官僚文化，咁或者會大收旺場嘞！