政情：吳文華讀大學 恨戴四方帽
立法會前秘書長吳文華（Pauline）退休後，生活多姿多采，除咗幫立法會撰寫有關《議事規則》多年演變嘅「天書」外，原來佢最近更重拾讀書樂趣，在澳洲一間大學修讀組織管理（Organizational leadership）嘅四年制遙距課程。
盼圓多年心願
Pauline話，佢係秘書處少數冇大學學位嘅職員，因為當年投考二級行政主任（EO）嘅基本要求並唔需要大學畢業。後來就算佢去到立法會，秘書處都唔使佢讀番個大學學位，加上多年來工作太忙，所以依家讀番個學位，就可以一圓佢多年心願，畢業時戴上四方帽。
Pauline啱啱獲一本女性雜誌選為年度十大傑出華人女士，佢話獲獎全賴昔日同事兼上司黃錢其濂（鮮忌廉），皆因鮮忌廉係上屆得獎者之一，於是向評審委員會提名佢競逐呢個獎項。Pauline話知道獲獎後開心到彈起，認為獎項係對佢多年喺秘書處工作嘅認同，覺得分外有意義。