政情：八月歸位打政改戰 高官放假趁早
關於二○一七年特首普選嘅兩份政改報告正式出爐，全國人大常委會料於八月底「一錘定音」，到時特首普選五大議題，包括提名委員會「民主程序」提名候選人、特首普選候選人數目都一目了然。據聞梁班子都知道此仗極之難打，特首辦同多個相關政策局劃定死線，溫馨提示各級人員要放假就趁早，最遲至八月十五日歸隊準備齊心打仗，一副有前無後打死罷就嘅格局。
立法會本月中已開始休會，十月先至復會，傳統上中間兩個多月係官員、議員休養生息嘅好時機，但今年卻例外，事關承接早前公布嘅兩份政改報告，特首梁振英啟動政改首部曲，向人大常委會提交報告提出修改一七年特首選舉辦法，人大常委會料於八月下旬商議議程，同月最後一周舉行一連多日會議，外界預計政改報告會榜上有名，會後更有「一錘定音」嘅決定，為政府年底次階段政改諮詢定下權威框架。
關乎餘下兩年管治成敗
由於政改一役不容有失，消息指至少特首辦、政制及內地事務局、民政事務局等各級人員，最近陸續收到溫馨提示，最遲要於八月十五日歸隊為政改備戰，提早「收風」同做好輿論鋪墊工作，換言之相關官員放暑假會比非政改年少放起碼一個多月，但考慮到今次政改成敗，關乎到現屆政府餘下兩年會否淪為「跛腳鴨」管治，無論在公在私立場出發，共同犧牲假期進入作戰狀態，似乎係無辦法中嘅辦法。
講開立法會休會期，唔使好似負責政改官員咁要提早歸位，官場流傳一個傳聞，原來有「空降」加入政府嘅官員認為，立法會休會期長達兩個多月算係放得比較耐，建議可否縮減休會時間，利用慳番嘅時間去處理積壓嘅工作。據聞有資深官員笑言，立法會休會期好重要，因為係全年唯一時間可以回一回氣，其後多名官員都開腔和議呢個看法，睇怕呢個「空降」官員慳番啖口水好過嘞。