政情：中環出更：榮念曾感慨西九「冇人睇住」
被譽為「香港文化教父」嘅「進念．二十面體」創辦人榮念曾（Danny）榮獲第二十五屆福岡亞洲文化獎「藝術文化獎」，令佢同往年得獎嘅諾貝爾文學獎得主莫言、日本知名導演黑澤明及本地著名導演許鞍華齊名。身兼西九文化區管理局董事局成員滿六年嘅Danny十月卸任在即，佢感慨斥資過百億元打造嘅西九「冇人睇住」兼淪為「文化消費中心」。
「乏發展藍圖 浪費軟實力」
政府近年銳意打造西九文化區，但Danny慨嘆喺官僚主義下，政府一直缺乏長遠嘅文化發展藍圖，浪費香港作為中國最重要嘅「軟實力」，要走向國際文化交流中心更加係漫漫長路，而政府官員抱住「唔做唔錯」嘅心態度日更係致命傷。
佢舉例話，新政府上場後成立文化局觸礁，認為政府可以先重設早年閒置咗嘅「文化委員會」，可惜佢連番游說多個決策局都不得要領，而身兼西九董事局主席嘅政務司司長林鄭月娥忙於籌備政改，無暇分心「照顧」西九。政府有幾重視文化界，市民心照喇。
卓妮