【本報訊】中學男教師聲稱遭所戀未成年女生之父，發信及派傳單「唱衰」他曾向女生性侵，而興訟控告該父親誹謗案。該父昨於區院繼續作供，原告一方質疑他，為何要求原告停止「搞佢個女」的同時，又帶備禮品上門向原告父母「提親」。父親解釋因「守唔住個女」，盼讓女兒「合理失身」，還說：「我唔係精神分裂，係好傳統嘅中國人，寧願佢日後離婚！」
原告是教師梁志宏（卅四歲），被告是女生父親梁銳成（六十四歲）。根據被告書面口供指，原告在一一年時轉往新校任教時，曾多次致電被告說：「我都唔係善男信女，根據公屋扣分制，我探你十次都丟垃圾，我罰一千五百，你就扣晒分」、「西方人都教子女用避孕套拍拖」、「係咪想無人送終？你個女要同你脫離父女關係，你就要住向晴軒！」原告律師直指上述對話皆是被告憑空想像，被告則堅稱屬實。
書面供詞亦透露，被告曾指斥原告「你變態o架，搞細路女！」惟原告當時囂張回應「有毛o架，仲濕添！」
另外，原告亦曾問被告：「可唔可以做你女婿？」被告當時拒絕，兼力數原告七個「不是」：「不忠不孝、不仁不義、無賴無恥非禮」但最終被告又上門提親。原告律師遂質疑被告：「有個人涉嫌侵犯你個女，仲不斷致電話鍾意你個女，咁你仲叫個女嫁畀佢？」。被告解釋他寧願女兒在婚後「合理失身」才再離婚。
案件編號：DCCJ3435/2012