鼠輩佔領屋邨 官僚病貓無能

大家細個一定睇過貓捉老鼠嘅卡通片,貓次次都笨手笨腳,被老鼠玩番轉頭。不過又奇喎,佢哋次次惡鬥一番後,都會攬頭攬頸做番好朋友。其實現實生活都係一樣嘅咋,至於邊個係老鼠嘅知己良朋?之唔係食環署官僚囉。

係咁嘅,本報接獲讀者投訴,觀塘翠屏南邨近年鼠患嚴重,鼠群長期佔據邨內園圃,不分晝夜出巡,視捕鼠措施如無物。有居民反映,啲老鼠大到成隻貓咁,每次出嚟搵食,更加係大模廝樣,三五成群有晒「隊形」添,完全當人類無到,問你怕未。

最得人驚嘅係,鼠輩們枝繁葉茂,兒孫滿堂,由於園圃內起鼠洞已經解決唔到龐大嘅居住需求,佢哋擴充地盤,入侵埋附近低層民居。唔知大家點睇,功夫茶就覺得,屋邨淪為巨鼠王國固然係恐怖到冇朋友,但係鼠輩們「見縫插針」、「寸土必爭」嘅精神,又幾值得特區政府學習。老實講,如果當局拓土建屋有佢哋一半咁積極,無殼蝸牛就唔使咁閉翳啦。

講番正題,到底鼠輩點解可以橫行無忌呢?鬼咩,房署同管理公司滅鼠工作唔湯唔水,放完鼠餌之後關人個關,冇定時添加,加上邨內衞生環境惡劣,垃圾桶冇遮冇掩,就咁擺喺當眼地方,咪變身老鼠嘅米芝蓮餐廳囉。咦,講咗半日,食環署去咗邊?冇錯嘞,之唔係忙於卸責同粉飾太平囉,佢哋承認發現翠屏南邨出現鼠蹤,但聲稱已經向房署及屋邨管理公司提供專業技術意見及衞生教育,覆查時鼠患情況已有改善。

唔係啩,提供意見就當做咗嘢?仲有冇再敷衍塞責啲呀?紙上談兵就聽得多啫,食環署官僚「紙上滅鼠」,鼠輩得以好食好住,安居樂業,仲唔引為知己咩?話時話,鼠輩們早已衝出屋邨,佔領全港啦。即使熱鬧繁華如中環,都試過有外國女遊客光天化日下畀老鼠咬傷;甚至耗資逾八十億元興建嘅啟德郵輪碼頭一樣淪為老鼠樂園。有人諷刺香港鼠蹤處處,遊客唔使專程去迪士尼樂園睇米奇老鼠,真係一啲都冇誇張o架。

可以咁講,鼠患嚴重只係港府管治無能嘅縮影咋。有屋苑木蝨為患,幾年都得唔到解決;有女生喺公開試試場被跳蚤咬到遍腿鱗傷,搞到試卷都答唔完;至於各區橫街後巷咯喎,更加係藏垢納污,淪為蛇蟲鼠蟻嘅大本營。

都係嗰句,老鼠肆虐,影響市容事小,傳播惡菌事大。有「新沙士」之稱嘅中東呼吸綜合症已經殺到埋身啦,唔該港產病貓——唔係——港產官僚咪繼續瞌眼瞓,否則等到爆大鑊至嚟補救就太遲嘞!