以色列、巴勒斯坦緊張局勢持續，火箭炮橫飛，港府七月八日都向以色列發出黃色旅遊警示，搞到立法會工商事務委員會原定嘅八月外訪以色列行程都要取消。早前有九位議員報名組團飛去以色列，考察吓當地嘅高科技及工業發展，早前我哋講過，呢次外訪團為咗減少開支，已經將行程縮減至六日，諗住減少外界批評，但係估唔到最終都係去唔成。
據聞一眾議員決定取消外訪以色列，係擔心冇意外保險。但另有一個講法話，泛民主派議員棄團嘅原因，係可能會提前在八月中佔領中環（佔中），如果被人知道佢哋去咗以色列考察而唔去佔中，一定腹背受敵。不過，團友之一嘅法律界郭榮鏗就否認呢個講法，又話議員安全重於一切，如果一日有黃色警示，都唔應該出發喎。
班議員一聲取消外訪以色列就相當簡單，但據聞打爛咗商務及經濟發展局個如意算盤，事關當局一心諗住靠呢個團幫準備成立嘅創新及科技局省招牌。據聞港府同以色列政府方面為今次考察做咗唔少工夫，如今話取消就取消，真係白費工夫喇。