政情：現身廉署 孫啟烈為開會
內地打貪風氣愈打愈烈，呢種風氣仲蔓延至香港，加上廉署有「貪湯」前廉政專員湯顯明呢啲佗衰家，搞到北角廉署總部外經常擠滿記者採訪。咁啱我哋尋日就見到工業總會前主席孫啟烈現身廉署總部，當堂打咗個突，心諗莫非連佢都要協助廉署調查？
接掌道德發展諮委會
孫啟烈接受查詢時就大笑三聲，原來佢啱啱做咗廉署道德發展諮詢委員會主席，接替剛剛被內地調查嘅前華潤董事長宋林個位，所以尋日去廉署係要開會。
呢個委員會由一班商界代表組成，由於有外國商會代表，會議一向以全英語進行，但尋日就有啲唔同，雖然會議都係以英語進行，但就特別加設即時傳譯員，仲講明係英文翻譯國語，即係話有委員唔識聽英文囉！咁啱我哋翻查資料，尋日有位以「香港中國企業協會總裁」身份開會嘅馮洪章首次出席會議，咁大家明白咩事啦。