政情：辣招告急 葉國謙話之你
立法會尋日開始審議俗稱樓市辣招嘅雙倍印花稅（DSD）條例草案，會計界梁繼昌（Kenneth）提出「減辣」修訂，要求政府豁免自用工商舖徵交DSD，建議得到多個商界政黨同泛民主派兩大政黨支持而獲通過，令工商舖炒風重現。雖然政府已經急急向各黨箍票，又要求反對修正案嘅議員坐定定開會，但分屬建制派嘅民建聯葉國謙一於「話之你」，今晚照搭飛機去巴西準備欣賞世界盃決賽。
民記擬取消訪美行救駕
立法會調查「貪湯」前廉政專員湯顯明醜聞嘅專責委員會前日發表調查報告，五位泛民議員不滿由建制派主導嘅主體報告用詞過分溫和，決定另行撰寫小眾報告，對貪湯予以「最強烈譴責」。工黨何秀蘭更灑淚批評身為港區全國人大代表嘅專委會主席葉國謙，用多種手法阻撓泛民調查真相，有包庇貪湯之嫌，做法令人極度失望。
葉國謙「包庇」貪湯後唔夠一日，就傳出Kenneth嘅修正案唔夠反對票嘅消息。雖然財經事務及庫務局局長陳家強唔肯評論政府係咪唔夠票，但該局副秘書長（庫務）陳美寶尋日成朝喺立法會行出行入，又不斷搵議員密斟，似乎係想箍票兼勸議員回心轉意反對有關修正案。
面對DSD形勢咁緊張，本來話要「拉布」嘅人民力量亦決定刻意鬆手。陳偉業話，人力嘅目標只係要見到創新及科技局「流產」，會盡力確保DSD順利通過，又話下星期會點少幾次開會人數，減低流會危機。
據聞本來民建聯會喺下星期前往美國多個大城市會見當地華僑，但該黨亦考慮取消行程，乖乖哋坐喺度幫政府反對修正案，費事臨門一腳先出事。
玩到月尾 葉死撐冇影響
不過，財經局同建制派呢頭喺度救亡，葉國謙嗰頭就決定如常去巴西睇波，玩完玩罷先喺月底施施然返香港。被問到擔唔擔心離開香港會搞到政府唔夠票時，佢就好肯定咁話一定唔會有影響喎。如果最後Kenneth嘅修正案因為唔夠反對票而獲得通過，搞到工商舖炒風重現，相信葉國謙將成為千古罪人。