中環出更：醫界三梁 飯局密斟
北上養老使費較低，成為近年唔少港人退休嘅選擇，但醫療卻係一大憂慮。卓妮尋日行經中環，就遇到港大醫學院院長梁卓偉（Gabriel）、港大校務委員會主席「金刀梁」梁智鴻及太太「放射科女王」梁馮令儀，三位醫生齊到港大校友會食飯密斟。講到香港長者在內地養老面對嘅醫療問題時，佢哋建議政府將港大深圳醫院納入成為「半間香港公立醫院」，港人可以香港公立醫院收費享有同樣嘅醫療服務。
港府計劃於深圳及肇慶購買由香港非政府機構於內地營辦嘅安老院舍床位，吸引唔少港人考慮在內地頤養天年。雖然住宿等費用低廉，但醫療同護老就成為居住內地港人嘅最大負擔。由於好多港人都對香港醫療及手術技術較有信心，金刀梁就話，目前兩間安老院院友若有需要，會由專車接送至本港關口，再召救護車轉送到北區醫院，惟過程冗長複雜。
倡港深醫院列「半間公院」
Gabriel就建議，港大深圳醫院可由港人醫生主理，管理及醫療服務和香港一樣，如果可以同港府合作，以本港收費提供醫院服務畀港人，方便快捷之餘又可以節省十字車運送等資源，好似割盲腸等簡單手術，就可以留在深圳醫院做喇。講起教書，Gabriel同金刀梁都話依家間中都係上深圳醫院客串吓，希望搞好間醫院。
三人食飯期間，仲講起讀醫時代嘅趣事。曾經做過金刀梁學生嘅馮令儀話，以前啲醫生好惡，成個大內總管咁，尤其佢隔籬嗰位（金刀梁）。有時太多嘢做唔切，當喺走廊見到啲上級，大家就立即雞飛狗走喎。金刀梁就反駁話，自己一啲都唔惡，因為當時根本忙到唔得閒理嘅學生喎！至於Gabriel就讚醫科學生好聰明，但有時好百厭，間中仲會走堂添！
卓妮