有人話，現實比小說更離奇，真係冇講錯o架。好似香港公立醫院嘅醫療事故咁吖，五花八門，無奇不有，直頭係鑊鑊新鮮鑊鑊甘。呢嗱，又嚟啦。
話說今年三月東區醫院新生嬰兒深切治療部一名初生嬰兒接受抗生素西弗士林治療，點知醫生喺電腦處方藥物時居然錯誤輸入多十倍劑量，後來好彩護士打針時用番正確劑量，嬰兒先至避過一劫，認真險過剃頭。
有藥劑師指出，嬰兒長期使用過量西弗士林，會導致腎功能衰竭，後果都咪話唔嚴重。所以咯喎，醫護人員做嘢好似差不多先生咁，求求其其，是是但但，同草菅人命冇乜分別嘅咋。正所謂，錯就要認，打就企定，東區醫院係就係認咗錯，弊在避重就輕，一味強調病人無受影響，仲大玩文字遊戲，話呢單嘢唔係藥物事故，係「險失事故」喎。喂，事故就係事故，不可一不可再，唔通真係要到搞出人命至嚟補鑊咩！
最耐人尋味嘅係，今次嬰兒平安無事，到底係護士醒目自行糾正，抑或有人冇跟柯打，錯有錯着，「因禍得福」，由於院方一問三不知，到依家仲係一個謎。嗱，當局唔可以就咁算數，應該搞清楚來龍去脈，如果唔係，下次未必有咁好彩o架。老實講吖，前線醫護人手長期短缺，七個蓋冚十個煲，搞到甩漏連連，今次冇出事只係幸運咋。
醫護人手究竟有幾短缺？唔少公立醫院新入職護士大吐苦水，病房雖然有多位資深護士，但佢哋自己都忙到甩轆，根本冇時間指導新人，心情唔好上嚟仲會冷言冷語添，每日返工都提心吊膽，簡直慘過落地獄。護士協會統計顯示，平均每三名護士照顧三十六名病人，一個對十二個，做到踢晒腳，唔出錯至奇。所以話啫，當局一直死撐已經增聘人手，護士荒有所紓緩，根本係吹水唔抹嘴。
護士人手固然緊絀，前線醫生亦唔好得幾多。有前線醫生踢爆，醫管局淨係識益自己友，不斷以高薪開位畀顧問醫生，反而坐視前線人手不斷流失，唔單止造成將多兵少，資深醫生掛住爭權奪利博上位，邊有心機照顧病人吖。唔怪得烏龍百出喇，莫講話寫錯藥劑分量，打錯針、輸錯血、開錯刀……醫療事故幾離譜、幾荒誕都有。
都係嗰句，公營醫療千瘡百孔，亂象叢生，歸根究柢都係因為管理混亂，肥上瘦下。黃台之瓜，何堪再摘，咪話功夫茶唔提醒，家陣港府民望低殘，管治仲脆弱過初生嬰兒，萬一再發生「醫人變殺人」事故，盞引爆更大民怨，唔衰攞嚟衰嘅咋！