政情：肥彭四大陷阱禍港
末代港督彭定康（肥彭）回歸英國家鄉多年依然陰魂不散，不時藉機訪港緬懷昔日風光，但佢始終「姣婆守唔到寡」，前日終於按捺不住，就國務院發表嘅白皮書越洋指指點點兼勁講風涼話，指摘北京要求香港法官愛國，係企圖破壞香港司法獨立，更驚訝港商冇走出來反對白皮書喎。雖然肥彭今時今日講嘢已經冇乜分量，但其實佢當年食住蛋撻、處心積慮幫英國政府向香港「落降頭」，最少掘咗「四大陷阱」畀特區政府踩落去，加上京官回歸前後對肥彭陰謀後知後覺，任由亂象肆虐，最終搞到一發不可收拾，中港政府「死於安樂」。
評白皮書 持雙重標準
肥彭前日接受英國《金融時報》專訪，指白皮書提到法官應該愛國，自覺有必要出來講句說話，並同泛民主派統一口徑，指法官唔應該將政治考慮置於法律之前。佢更慫恿港人若覺得《中英聯合聲明》條款有被削弱，絕對有權向中、英兩國表達關注，但對於英國首相卡梅倫對白皮書隻字不提，佢就視若無睹，認真雙重標準。
肥彭又對香港商界巨頭冇就白皮書表達更大嘅反對聲音感到surprising（意外），估計呢啲跨國企業事前未有同所屬嘅國際總部取得共識，相信佢哋嘅總公司會對香港分部有咁嘅決定感到意外同有啲尷尬喎。不過，眾所周知港英政府回歸前夕安插肥彭掌權香港，就係為即將撤退嘅英國主子喺香港布下多個陷阱，結果京官、港官上下無不輪住踩入陷阱。
最新鮮滾熱辣嘅一定要數啱啱發生「飛玻璃杯」風波嘅立法會答問大會，當年肥彭接掌香港後開始定期舉行答問會以維持曝光率同發言機會，由於當時嘅泛民對港英政府唯命是從，肥彭當然能夠駕馭大局啦。可惜回歸後三屆特首：董建華、「貪曾」曾蔭權爵士同梁振英，口才唔係叻又偏偏懶叻保留答問會呢個「傳統」，結果答問會近年淪為反對派「圍毆」特首嘅擂台，特首上親擂台都「硬食」泛民進擊，自取其辱。
另一大陷阱，就係肥彭喺回歸前夕忽然對香港民主「大平賣」，強推加入民主成分嘅政改方案，令泛民回歸後食住個勢繼續搞風搞浪；加上港英政府多年來硬銷司法獨立，掀起莊豐源案、外傭居港權案等多宗激發社會矛盾嘅風波，搞到香港家無寧日。而肥彭在九六年先後成立平等機會委員會、私隱專員公署等公營機構，表面上透過獨立機構處理申訴，但實際運作多年，只見到呢類型機構挑起更多官司和糾紛。
中港政府「死於安樂」
肥彭之所以成功設下陷阱，都要內部發緊夢配合，好似回歸前時任新華社駐港分社社長周南及港澳辦主任魯平，及回歸後改由姜恩柱同廖暉分掌兩辦等京官，喺多個重要時刻都懶理香港亂象，只顧飲飲食食，其中廖暉掌管港澳辦十三年，更從未就香港事務公開表態，任由泛民坐大禍港，到依家香港亂象已成定局，返魂乏術，最終中港政府「死於安樂」。