中環出更：「德粉」胡曉明 論波會友
巴西世界盃掀起全城睇波熱，熱愛運動嘅香港專業及資深行政人員協會前會長胡曉明（Herman）以波會友，日前搞咗個「趣萃薈」，取其諧音「吹水會」，逾六十位好友齊去飲啤酒講波經。Herman自認係德國隊頭號粉絲，不過講到通宵睇波，佢就耍手擰頭，自嘲年紀唔細，捱通宵好快殘，寧願翌日起身睇賽事重溫喎！
吹水會喺Herman旗下一間德國餐廳舉行，現身嘅仲有專資會常務副會長黃偉雄、靚女會員溫文蕙及霍靄玲等人，灣仔區議員伍婉婷亦有到場。現場有德國啤酒任飲，大家當然舉杯暢飲。呢晚講明要着波衫，Herman着上德國隊件衫，立場好鮮明，其他人則各自各精彩，有人捧阿根廷、巴西，亦都有人撐英格蘭，驟眼望去世界知名勁旅幾乎齊晒。
封梅拿做偶像
話明係「吹水會」，無理由齋飲。Herman特登請來足球評述員分析最新戰況，又將世界盃多場分組賽事合共逾一百三十個入波鏡頭，剪輯成精華片段，眾人一邊重溫，一邊講解戰術，過足波癮。睇完波，仲有問答遊戲及啤酒競飲比賽，獎品係專程由巴西運返香港嘅世界盃紀念品，包括毛巾、T恤同足球等，咁吸引，個個爭住舉手搶答，氣氛好熱鬧。
Herman力捧德國隊，笑言早已封該隊球星梅拿做偶像，讚佢有型又好波。日前世界盃足球賽八強淘汰賽，第一場賽事由法國對德國，結果德國以一比零擊敗法國，率先晉級四強，總算冇令球迷失望喇！
卓妮