港女星心痛 翠如BB展望下屆
【本報訊】對於尼馬受傷，香港娛樂圈中多位女星都心痛不已，身為巴西忠實擁躉的黃翠如，昨接受電話訪問時表示：「好傷心，尼馬傷得好唔抵，見佢喊我諗所有球迷都心痛，我都唔開心到想喊！我係巴西die hard fans（忠實擁躉），鍾意巴西其中一個原因都係尼馬，依家佢受傷，我仍然堅持支持巴西隊！但隊長都唔打得，我好擔心仲贏唔贏到，希望用嗰團火可以再努力啲！亦都希望尼馬可以快啲好番，佢仲後生，下屆一定仲有作為！（認為應罰辛尼加？）蘇亞雷斯咬膊頭都罰停賽啦！應該罰辛尼加，等佢知道自己唔啱，至於點罰就交由國際足協決定。」
藝員何傲兒亦表示痛心：「好可惜！我勁鍾意尼馬，希望佢快啲康復，唔好因傷患影響前途，我對巴西有信心，仲睇好佢贏，因為仲有其他好波之人！」
至於名模琦琦得知尼馬受傷後，昨日即在微博鬧爆辛尼加：「一起來就看見內馬爾（尼馬）骨裂的消息，唉，哥倫比亞18號（辛尼加）太野蠻了，女兒昨晚（凌晨）看到他受傷哭了，椎骨骨裂，讓他徹底告別世界盃！但讓我們把掌聲，送給這位真正的巴西鬥士——內馬爾（尼馬）。」
另外，女子組合Super Girls成員Heidi及Cheronna昨在活動時，都為尼馬受傷感到傷心，Cheronna說：「我知佢整親，好唔開心！希望就算無咗尼馬，巴西都繼續努力踢啦！」Heidi更謂：「我喊咗好耐，喊到眼都腫埋！」