阿根廷破7月魔咒入4強

希古恩（右二）打破國家隊11個月入球荒。（Getty Images圖片）

阿根廷主帥沙貝拉今仗突然改動防線，起用今屆從未上陣的老將迪米捷利斯鎮守中路，剛傷愈的前鋒阿古路暫居後備；雖然比利時首相迪魯波今仗專誠入場打氣，但阿根廷開賽後立即搶攻，8分鐘迪馬利亞傳中省中比利時球員改變方向，反而造就了箭頭希古恩順勢抽射破網，助阿根廷極速領先，希古恩亦打破於國家隊長達11個月的入球荒。

失波後比利時冇坐以待斃，其中奇雲迪布尼放冷箭遭阿軍門將羅美路撲出最具威脅。32分鐘「天使之翼」迪馬利亞不幸傷出，但對阿根廷並冇太大影響，之後美斯妙射罰球僅僅高出，半場阿根廷領先1比0。

希古恩（右）上半場火速建功。（美聯社圖片）

美斯被犯規就見得多，原來佢犯規都好夠狠！（法新社圖片）

「小魔獸」冇料到

易邊後阿根廷得勢不饒人，尤其係打破入球荒的希古恩更見重拾信心，表現特別醒神，52分鐘先在禁區邊快射僅被閂出，56分鐘他策動突擊快放了大半場，並幸運地推過對方中堅高柏尼，可惜勁射中楣彈出，有見及此阿根廷將希古恩換走，派出加高鞏固防守，力保領先優勢。比利時主帥韋莫斯見勢色不對，58分鐘果斷地換入「小魔獸」盧卡古及梅頓斯加強攻力，但都腳頭無靈，未能收復失地，最終「潘帕斯雄鷹」小勝一粒，並且終止自1966年世盃後，48年來每逢踏入7月的世盃賽事法定時間未嘗一勝的魔咒。