立法會財務委員會尋日審議注資職業訓練局推行職業教育及就業支援嘅撥款申請，事前表明會「拉布」嘅人民力量議員陳偉業提出中止待續議案，批評主席吳亮星喺上周五處理新界東北前期工程撥款時處事不公，又話吳亮星身為中國銀行（香港）信託董事長，同唔少機構嘅關係千絲萬縷，要求暫停討論議案。不過，工聯會王國興就反駁話，唔少泛民主派議員都有中銀戶口，認為佢哋反對理由太無譜喎。泛民議員有中銀戶口又關反對議案咩事呢？佢咁樣九唔搭八盲撐吳亮星，隨時燒埋自己。
