政情：梁紀昌明年退休 Hea完再拚過
鮮魚行學校尋日舉行第四十四屆畢業禮，人稱「校長爸爸」嘅梁紀昌話自己明年就六十歲，係時候退落嚟，所以做埋下學年就會退休，退休後會Hea吓先，叉足電再為社會服務喎。咁餘下一年任期會有咩大計呢？佢話會為畢業生爭取去外國讀書，擴闊眼界，而且會繼續爭取興建新校舍。
爭取建新校舍
在鮮魚行學校工作十二年嘅梁紀昌話，即使政府將公務員嘅退休年期延長，佢都唔打算做落去，「校長呢個位唔應該做太耐，如果唔係想法會變得保守。」不過，相信佢離開時仍會掛心嘅，就係爭取興建新校舍，事關依家學校校舍連操場都冇，又成日停電，可惜校方先後兩次向政府申請建校都唔成功。梁校長就笑笑口話會屢敗屢戰，仲話只要有個操場，就心滿意足o架喎。
被問到退休之後有咩大計，梁校長話只要有能力，都會盡力回饋社會，但暫時未有具體計劃，都係隨緣啦。不過，「校長爸爸」始終唔係鐵人，佢話做咗咁多年，都係畀佢Hea一陣，休息下先喎。