政情：百彈棠哥 仲未鬧自己
香港面臨政改多事之秋，行政立法關係惡劣，社會爭拗持續，行政會議成員鄭耀棠（棠哥）尋日就開腔狠批泛民主派喺度搞公投、又話要反篩選，其實就係想「又呃又騙又食又拎」，又狠批「民主阿婆」政務司前司長陳方安生欺騙傳媒，就連港澳辦前主任廖暉、建制派立法會議員田北俊（田少）都鬧埋，幾乎想鬧晒全世界。不過，棠哥鬧得咁過癮，好似唔記得咗自己係建制派人員，鬧建制派即係鬧自己，加上佢係行會成員，香港搞到咁紛亂，唔通佢完全冇責任嘅？
狠批泛民「又呃又騙」
其實棠哥近期都淡靜咗好多，只係七一當日蒲過頭，尋日佢同傳媒茶敍時就大發牢騷，慨嘆香港普選睇唔到出路，好似送咗入深切治療部嘅病人咁，就算醫生點努力，都係要宣布死亡喎。佢又批評泛民口口聲聲要反篩選，但佢哋所謂嘅民間公投中嘅三個特首選舉方案都係「篩出來」，潛台詞就係一定要有佢哋份參選，根本喺度「又呃又騙又食又拎」，但仲同班年輕人吹噓、鼓勵佢哋公民抗命，根本就係泛民同年輕人之間「互夾」。
「建制唔應該插建制」
對於民主阿婆日前話《基本法》規定修改特首選舉，冇提及要中央政府批准，質疑北京「搬龍門」，棠哥就直斥︰「呢個人根本係欺騙傳媒、講錯嘢，一口咬定中國『搬龍門』，根本就係唔熟書，錯得好交關，但就唔出來認錯，半點勇氣都沒有！」咪以為棠哥嘅矛頭淨係指向泛民，佢竟然連廖暉都鬧埋。棠哥話，關於香港一國兩制嘅白皮書本來並無新意，唯一新嘅地方就係一國兩制包含喺中國夢入面。佢話呢啲嘢本來廖暉就應該做好「守龍門」角色，但佢唔講，久而久之就被人攞嚟講喇。
對於依家嘅政治，棠哥亦都嘆晒氣話香港嘅政治水平低劣。佢話外國人選舉完後都可以坐低飲啤酒，但香港就當正人哋係仇人，仲暗踩喺答問大會質問特首梁振英會否落台嘅田少，話佢講得出咁嘅嘢係非常低莊，仲話有勇氣做建制派嘅就唔應該去插建制，仲質疑田少︰「佢係咪想做特首？定係畀佢『大佬』做咋？」棠哥鬧勻泛民同建制，估唔到年紀咁大仲咁好火，但佢都係建制派一分子，莫非佢完全冇問題？希望佢唔好有口話人冇口話自己啦。