中環出更：廠商會荔枝樂 又食又拎
又到荔枝飄香時，今年內地荔枝豐收，荔枝團大旺。家族喺東莞擁有荔枝莊園嘅中華廠商聯合會（廠商會）副會長陳淑玲（Shirley），日前趁放假帶隊北上摘荔枝，一眾副會長及會董攞住大籮密密摘。雖然話一啖荔枝三把火，但大家飽嘗口福後，再帶多幾斤荔枝返港，莫非佢哋唔怕火上加火？
今次Shirley帶隊參觀嘅千畝荔枝莊園，本屬佢爸爸陳瑞球所擁有，但球伯多年前已將土地捐贈予當地市政府，雖然係咁，但陳家只要開句聲，荔枝依然任摘唔嬲。荔枝莊園內仲設有實驗室，研發荔枝多達三十種，無論大核、小核、少甜多汁的，任君選擇。
盧毓琳食一粒停口
一次過食三十款荔枝，廠商會會長施榮懷話好玩過食甜品自助餐，拉埋副會長吳永嘉、楊志雄、徐炳光、吳宏斌、常董李慧芬及會董盧毓琳等人，鬥快摘荔枝。傳聞有意同Shirley拗手瓜競逐會長嘅副會長李秀恒（Eddy），都有隨團湊熱鬧，當日暫時放下拉票工作，好好享受陽光假期。
Eddy全程做「龍友」幫團友影相，忙到食荔枝都無時間。團友摘荔枝摘得不亦樂乎，裝滿數十個大籮，惟獨見盧毓琳停晒手，原來佢怕荔枝糖分高會引發糖尿病，所以淺嘗一粒「糯米糍」就停口，認真節制。
卓妮