世界盃十六強賽事已經開波，睇波熱潮一浪高過一浪。開講有話，物極必反，狂歡過咗龍，分分鐘發生不測o架。歌仔都有得唱：「怕幸福太美，樂極會生悲」吖嘛。
嗱，有人因為沉迷賭波愈陷愈深，欠落周身債，走投無路，選擇輕生，世界盃以嚟已經有好幾單喇；亦有小球迷太投入，半夜開始連踩兩場賽事，搞到體力透支，昏迷送院。唔講唔知，原來仲有一樣嘢風險更高，市民好可能中咗招都唔知，一個唔覺意，隨時葬身火海一鑊熟都有之。
即係咁，好多人鍾意落酒吧睇波，貪氣氛柴娃娃夠熱烈。不過睇還睇，如果幫襯咗間無牌酒吧，咁就大劑嘞。本報跟蹤追擊發現，唔少無牌酒吧近排食住世界盃條水旺到爆。除咗喺旺角呢啲「蒲點」成行成市，更加殺入大埔同觀塘呢啲地區。
呢嗱，大埔一幢唐樓二樓就有一間，門口寫住「只招待本會會員」，查實只係掛羊頭賣狗肉，唔止來者不拒，連小朋友都歡迎添。入面陳設非常簡陋，而且根本見唔到酒牌同會所牌照。另一間喺觀塘工廈嘅酒吧，為咗慳皮，索性上網睇世界盃唔使畀電視台轉播權，場內有啤酒不特止，連威士忌都有得招呼。
警方話就話不時巡查，但你有張良計，佢有過牆梯，酒吧界行家踢爆，近年無牌酒吧轉咗用「快閃」戰略，靠無牌經營慳成本賺快錢，做得一日得一日，一有投訴警告即搬竇，喺其他地方再開過。
正所謂，殺頭生意有人做，蝕本生意冇人做。無牌酒吧成本只係領牌同行嘅十分之一，利益驅使之下，好多經營者諗住博得就博，鋌而走險，對攞正牌經營者構成不公平。最大問題係，呢啲無牌酒吧無論消防定通風等嘅設備，統統都唔符合法例要求。記者喺大埔無牌酒吧見到有人肆無忌憚咁煲煙，萬一大吉利是有煙頭「辣」着易燃物品引起大火，後果不堪設想。咁嚴重嘅消防安全隱患，當局點可以坐視不理o架！
講開又講，無牌酒吧轉戰工廈同舊樓，本報已經揭發多次，部分酒吧仲變成「私竇」，淪為毒禍溫床添。唉，講到監管失職，港產官僚真係要打二十大板。近年因為租金飆升，唔少舊工廈同商住樓宇因為租平成為搶手貨，樓上舖五花八門乜都有，酒吧、賓館、劏房樣樣齊。好多人乘機博懵，無牌經營大行其道，而當局監管就敷衍求其，隻眼開隻眼閉，卒之搞到呢啲地方烏煙瘴氣，危機四伏。
功夫茶提醒你班港產官僚，人命關天，唔該積極行動，嚴厲執法，咪再懶懶閒胡混度日嘞！