政情：廣東社團總會換屆閉門交接
廣東社團總會（總會）尋日舉行極之低調嘅閉門交接儀式。可靠消息人士話，儀式於中午時間在九龍灣一間酒樓舉行，席間唔見有港府高官或中方官員捧場，只係自己友食餐飯，大約筵開十幾圍，出奇咁低調。
咁啱尋日下午約三點半鐘，總會新任主席陳永棋（棋哥）現身中環畢打街，見佢雙手抽住兩箱荔枝，左顧右盼穿過車水馬龍嘅馬路，大熱天時，有咁上下分量嘅棋哥行到身水身汗，眉都皺埋，最後行入中建大廈。
新主席陳永棋速遞荔枝贈友
原來棋哥啱啱喺家鄉東莞返港，當地有個以佢母親陳方柳枝命名嘅農場，種植經改良嘅有機荔枝，前日佢啱啱喺樹上新鮮採摘一批荔枝，尋日即刻親自速遞送贈老友，認真唔話得。不過話時話，一粒荔枝三把火，依家香港政局躁動不安，今日仲有遊行，雖然荔枝當造又美味，但大家都係適可而止，免得火上加油。