政情：張華峰驚死 棄抽脂減肥
重三百磅嘅拉丁舞教師喺美容院抽脂暴斃，令唔少女士都對抽脂有所戒懼，但唔好以為女士先對抽脂有興趣，其實男士貪起靚上嚟都係一樣。立法會內最具「分量」嘅金融服務界議員張華峰，一直搵過唔同方法減肥，例如食營養餐單等。原來佢仲諗過抽脂減肥，本來佢十五十六考慮緊，但一聽到最近單新聞後就即刻打退堂鼓。
頻食消夜 體重暴增
張華峰兩年前剛入立法會，體重一度下跌至二百三十幾磅，但現時佢嘅體重，已經成為政壇不解之謎。佢話近期立法會不停點人數，食飯時扒兩啖就要返入會議廳，食到好無癮。以為佢咁會輕咗就大錯特錯，因為佢食唔飽，開完會就要去食多次消夜至飽肚，結果體重就不跌反升。
所以張華峰把心一橫，諗住靠抽脂減甩腰間肥肉，而且佢已經詳細研究過抽脂利弊，仲睇過電腦模擬圖，覺得自己抽脂後靚仔好多，正當佢諗住扑錘抽脂之際，就爆咗單抽脂奪命嘅案件，所以佢話打死都唔用呢啲方法減肥喎。咁點算好呢？口講就話食少啲，但係遇上「天敵」東坡肉就只能舉手投降。