接駁巴無影 乘客乾煎句鐘
【本報訊】港鐵應變混亂，接駁巴士不見影，乘客烈日下乾煎一小時！事故後港鐵安排接駁巴士往來沙田站至大埔墟站，疏導受影響乘客，不過各站的秩序非常混亂，乘客大排長龍之餘，更遲遲未見接駁巴士蹤影，加上港鐵的指引極不清晰，令在烈日下「乾煎」候車的乘客「嬲到爆」，炮轟港鐵「呃錢」！
剛在火炭站逃出「蒸籠」列車的蔡先生指，在接駁巴士車站等了超過一小時，仍未見有巴士出現，他怒斥：「又話十分鐘一班，價就識加，一架巴士都無，點安排呀！」港鐵疏導乘客不善，亦令打工仔遲大到。
被困火炭站的鄧先生指，事故後港鐵職員引領乘客到接駁巴士車站候車，但遲遲未見巴士蹤影，要去中環上班的他炮轟港鐵：「我要影低晒所有證據，向公司證明港鐵累到我遲到！」就讀中六的譚小姐亦指：「等接駁巴士等咗成個鐘，本身約咗人睇戲，依家影響晒行程！」
安排混亂 應付不到人流
麥先生一家四口本來去落馬洲郊遊，豈料遇上港鐵出事，更指：「兩個女因為坐接駁巴士暈車浪！」而譚小姐則直斥：「港鐵安排好混亂，根本應付唔到咁多人流，感覺佢哋好呃錢！」另外，乘客杜小姐及李小姐則分別指摘：「呢排加咗價，港鐵應該做番好少少。」及「港鐵成日加價，但呢一至兩年成日有事故，好應該檢討吓！」