公立醫院護士人手短缺早就唔係新聞，但究竟短缺到乜嘢程度呢？嗱，一個護士要服務十一個病人，比歐美先進國家高出一倍，幾乎同第三世界睇齊，你話係咪醜怪吖？「十個煲七個蓋」，再咁落去，遲早爆煲嘅咋！
護士協會係咁講嘅，現時護士與病人比例比起十年前嘅一對十更差，精神科及急症科甚至達到一對十二及一對十三，而夜更護士與病人比例更加係一對二十三添，問你驚未。咁都唔止吖，一半病房唔係每更都有資深護士作臨床督導，而護士對病人服務助理嘅比例就愈來愈縮窄，達到二比一，唔知當局係咪想用助理代替護士呢？簡單啲講，「去護士化」情況日益嚴重，唔怪得好多病人一提起公立醫院就怕怕喇。
最離譜嘅係，護士荒愈演愈烈，而醫管局依然氣定神閒，聲稱今年已取錄逾千六名大學本科畢業生，將於八月履新，加上每年約三百名從私營市場回流嘅護士，可紓緩人手不足問題喎。咁就奇嘞，醫管局年年都話增加資源，年年都話增聘人手，結果問題依然毫無改善，人手依然嚴重短缺。就好似舊年咁吖，醫管局增聘近千名畢業生，但一樣係「十個煲七個蓋」，證明所謂增加資源根本係大隻講。難怪「東方報業民意調查」顯示，三成八受訪者直斥前線資源仍然不足，三成一認為已改善人手只是假象，兩成五批評治標不治本。
係人都知，醫護人員長期不足，工作壓力太大，必然影響醫療質量，亦必然容易發生醫療事故。撇除涉及病人嘅醫療事故唔講，淨係醫護人員本身咋，工傷個案維持每年三千宗以上，比建造業工業意外數字仲要多，簡直匪夷所思。試諗吓，連醫護人員都自身難保，醫療質素又點會好吖。
再講吖，就算醫管局真係增加咗人手，但全部係啱啱踏出校門嘅新丁，又冇經驗，又欠缺資深護士從旁指導監督，諗落都牙煙喇。正如立法會議員話齋，醫管局只睇數字，唔理質素，只會令問題積重難返嘅咋。嗱，上述民調顯示，對於資深護士不斷流失，三成八受訪者指官官相衞，肥上瘦下，三成一認為增加人手亦無法杜絕護士流失，兩成七直斥醫管局管理無方。
講到底，醫管局經費年年增加，結果依然係烏煙瘴氣，七國咁亂，問題癥結唔係經費唔夠，而係管理混亂，資源分配不均，尤其係肥上瘦下最令人反感。當局早前煞有介事成立醫管局檢討督導委員會，可惜遲遲未有下文，究竟仲要拖到幾時呢？唔通真係要等到護士壓力爆煲至肯做嘢？