政情：中港矛盾 營商「麟」陷不便
中港矛盾愈來愈嚴重，繼有青年人到尖沙咀等旅遊旺區指罵內地個人遊旅客為蝗蟲、到之後嘅拉篋行動，嚇怕啲旅客，商戶叫苦連天。身兼全港各區工商聯會長嘅東華三院副主席李鋈麟（Alan）話，其實佢喺內地做生意都受中港矛盾影響，為咗做成生意要做多重功夫，真係有啲唔方便喎。
要表明大家係兄弟
Alan話，以前內地人主動稱呼港人做「哥兒們」，但自從中港矛盾爆發後，依家佢要做番主動，表明大家係兄弟，否則內地人對港人嘅戒心唔會減低。
唔單止咁，Alan仲話以前傾生意會齊舉杯飲勝，但依家內地人就會排住隊嚟同佢哋飲，好似想隊冧佢哋咁款。
Alan坦言，其實一切矛盾出於文化差異，最重要係慢慢化解矛盾，其實內地已做緊教育，例如北京嘅中小學會教學生餐桌禮儀，所以港人只要包容啲，或是用客氣嘅語氣同旅客解說香港文化，咁就小事化無喎。