連續多過星期五，立法會變成反對新界東北發展嘅重要舞台，議會內嗌交，議會外衝擊，混亂不堪。經常在周日變身「鍵盤戰士」嘅財政司司長曾俊華（鬍鬚曾），尋日發表網誌話，希望大家要學習看見「自己眼裏的樑木」，因為冇人能夠掌握全部真理喎。佢所講嘅「樑木」，係出自聖經馬太福音：「為甚麼你看見兄弟眼裏有刺，但卻不想到自己眼裏的樑木？」意思係只識挑剔別人，卻不知自己嘅偏見或缺點。鬍鬚曾連聖經都出動埋，唔知下次會唔會話新界東北發展係「五餅二魚」，可以滿足晒往後嘅住屋需要呢？
