政情：議員無限簽 助理證氾濫
立法會財務委員會審議新界東北發展計劃前期工程撥款期間，有議員助理就被質疑同示威者「裏應外合」、煽動示威者、利用議員助理證件在立法會大樓內「踩線」，部分助理更參與埋衝擊行動。早前立法會行政管理委員會就開會討論關於議員助理證件嘅問題，但原來攞咗最多證嘅議員，並唔係喺衝擊事件中有議員助理被拘捕嘅張超雄同「長毛」梁國雄，而係守規矩嘅議員梁耀忠同建制派議員。
稱實習生離職未退還
不論議員、議員助理、記者或公眾人士出入立法會大樓都需要申請證件，但唔同證件就有唔同「待遇」，好似議員助理證嘅權限可以話係暢通無阻。不過，原來部分議員簽發咗二、三十張議員助理證，認真誇張。發出最多議員助理證嘅竟然係並非行激進路線嘅梁耀忠，有超過三十張議員助理證。而建制派議員葉劉淑儀同陳婉嫻就「屈居」亞軍同季軍，分別發出三十張同廿九張議員助理證。議員梁家傑同張超雄亦都每人發出超過二十張證。
我哋就問過呢幾位議員點解要咁多議員助理證，梁耀忠話，印象中好似冇發過咁多張議員助理證，因為佢只係得十幾個同事，估計可能有啲前同事或暑期實習生離職後未退還證件。葉太就話，因為其辦事處、所屬新民黨及匯賢智庫都有同事要在立法會工作，加上佢哋時不時都有唔少尖子實習生，所以計計埋埋有咁多張議員助理證都唔出奇。而梁家傑同張超雄嘅理由都係差唔多，可能啲暑期實習生離職後，未有及時交回證件畀秘書處咁話。
設限恐「斬腳趾避沙蟲」
另外，會計界議員梁繼昌都被指持有十幾張議員助理證件，佢就呻冤話自己有退番啲冇用嘅議員助理證畀秘書處，質疑秘書處未更新資料。佢又話，其議員助理周澄同王浩賢都已淡出社運界，並冇參與衝擊立法會喎。不過，發生立法會衝擊事後，對於議員無限制發出議員助理證件，實在令人關注，但限制議員發證又可能妨礙議員日常工作，有如「斬腳趾避沙蟲」，睇嚟行管會真係要諗吓辦法至得。