政情：中環出更：阿娟撐東北撥款 中學校友不滿
立法會財務委員會喺一片爭議下通過新界東北發展前期工程撥款，中華傳道會安柱中學一批校友就喺社交網站發起聯署，要求校方將有份投票支持通過議案嘅立法會議員麥美娟剔出「榮譽校友」名錄。麥美娟回應話，尊重校友表達意見自由，以及校方任何嘅處理方法，強調日前喺立法會上投贊成票，係基於撥款只是用作新界東北的前期發展等研究工作，「如果因為我影響母校，想講聲唔好意思」。
聯署促剔出「榮譽」名錄
校友聯署信指，麥美娟於10／11年度成為母校安柱中學嘅榮譽校友，但質疑佢喺立法會的兩年工作，因此特致函校董會、校友會、校長及老師，要求校方慎重考慮，將佢喺榮譽校友榜中除名，形容「是次撥款是以非法投票強行通過」，又批評佢「助紂為虐」，以破壞法治嘅手段，通過一個不公義議案。
聯署又指，雖然認同麥美娟嘅知名度，但認為其價值觀及行為違背安柱校訓「信義忠誠」嘅教誨，質疑「難道知名度或所謂的『社會地位』比品德更重要？」本報直至截稿前仍未能成功聯絡安柱中學校長回應。
卓妮