政情：中環出更：名人談親子 溝通最緊要
許多父母工作忙碌，與子女溝通時間自然少，如何拉近彼此距離呢？幾名官員同議員尋日出席一個以「愛與恕」為主題嘅風箏設計活動時，分享與子女嘅相處心得。民政事務局副局長許曉暉（Florence）話，做父母最重要係盡量抽時間陪仔女，而佢同老公就會互相合作，好似踢世界盃咁，各守一個崗位，再走吓位，如果走位走得靚嘅話，咁就可以完成一場完美嘅比賽喎！
不過，Florence話因為太忙，所以好少同囡囡放風箏，記得有次在內地買咗隻袖珍風箏送畀囡囡，囡囡已興奮得在家玩得不亦樂乎。同場嘅立法會議員陳恒鑌都話，依家議會工作好忙，尤其係立法會「拉布」期間，要靠晒老婆去照顧囡囡，但佢一有時間就會盡量陪囡囡做啲手作，當係親子活動，包括整湯丸同紙風箏，未來仲計劃包埋水餃添，佢希望立法會唔好成日「拉布」喎。
田二少放風箏愛被鎅
至於仔女都長大成人嘅議員田北辰（田二少）憶述，以前因為忙於處理生意業務，好少陪家人，到子女長大後，佢又做咗議員。
不過，佢講起自己細個就好開心，記得當年好多小朋友在街上放風箏，佢亦在九龍塘屋企天台放風箏，而且細心研究，仲認識風箏有多種線，包括魚絲線、玻璃線等，通常其他小朋友會用玻璃線鎅人哋啲風箏，但佢就鍾意被人鎅，所以好快又要買過隻，而佢媽媽在旁睇得好開心。
對青年人心理好有研究嘅視覺藝術家林旭輝就話，講到底最重要係孩子同父母有足夠溝通，如果一齊畫吓壁畫、拍吓微電影，其實都可以抒發吓情緒。
卓妮