弊傢伙！食物安全再響警鐘，毒菜殺入街市，市民隨時中招。
唔係功夫茶靠嚇o架。呢，有關注團體抽驗市面二十個蔬菜及菇類樣本，結果好得人驚，三成樣本超出中、港重金屬含量標準，包括四個樣本嘅鎘含量超出本港規定最高濃度，其中一個乾冬菇樣本，更加超標接近一倍添。另外兩個通菜同一個西洋菜樣本亦被驗出水銀含量超出內地標準三至四成，同時超出本港鎘含量標準兩成八。毒菜問題嚴重成咁，市民容乜易病從口入o架？
重金屬呢家嘢非同小可，市民不知不覺吞落肚，輕則傷身，重則大病，好似食咗鎘及水銀超標嘅蔬菜，腎臟功能及中樞神經系統有可能受損。咁點解重金屬毒菜仲可以賣到成行成市呢？原因咪又係官老爺尸位素餐，監管甩漏囉。更荒謬嘅係，本港蔬菜嘅重金屬含量指標多係上世紀八十年代產物，莫講話比國際標準寬鬆，連內地嘅標準都不如，以蔬菜含鉛量為例吖，本港嘅標準訂於每公斤六毫克，比內地寛鬆咗二十至六十倍，問你怕未。當局抱殘守缺，毒菜點會唔長驅直入吖。
係人都知，本港蔬菜供應絕大部分來自廣東省地區，弊在當地環境日益惡化，土壤污染問題愈演愈烈。內地官方都承認，廣東近年受工業排污影響，農地重金屬污染日益嚴重，珠三角地區更加係重災區，供港蔬菜安全風險之高不問可知。本報記者曾現場直擊，發現不少菜農使用未分類垃圾，包括廢棄電池、舊膠樽、塑膠廢物等做肥料，菜場受到嚴重污染，土壤重金屬嚴重超標，其中鎘含量更超出標準兩倍有多。當地除咗有蔬菜供港，仲有活家禽同淡水魚等等，你話嘞，食品由「垃圾肥」養大，重金屬超標有乜出奇吖。
出奇嘅係，珠三角土壤污染人盡皆知，淨係官老爺扮唔知，一味闊佬懶理，既冇加強檢驗抽查，又冇收緊食品安全指標，直情靠害。唔係咩，每逢內地食品出事，香港實冇走雞，孔雀石綠水產呀，蘇丹紅禽蛋呀，三聚氰胺毒奶呀，龍口毒粉絲呀，仲有台灣嘅塑化劑呀，當局次次後知後覺，次次賊過興兵，市民指望佢哋把關，死得喇。
家陣內地無物不毒，無食能安，有人話問題嘅癥結係官老爺樣樣有特供，其實香港都差唔多嘅咋，官老爺食嘅多係外國進口食品，幾時見過佢哋到菜市場買菜吖，幾時見過佢哋同市民同甘共味吖。計功夫茶話齋，解決毒蔬菜問題其實不難，罰官老爺一齊食重金屬蔬菜，佢哋就知驚嘞。