渡海濠情：護理玉手有商機
近年分享網站普及，好多新娘子喺男友求婚後，都會把戴上求婚戒指嘅玉手照片發布上網，但事後好多新娘子都會感到後悔，因為發現隻手皺紋多多認真唔見得人，而嚟自9號會所嘅小雪，就覺得內藏無限商機。
皺紋滿布
小雪話：「我曾經學過美容化妝，對護膚都有啲心得，好多姊妹都好着重塊面，加上相關嘅化妝品或保養品可以話多到不得了，所以姊妹們塊面個個都搞到好似剝殼雞蛋咁又白又滑，但往往顧此失彼，其他地方，特別係雙手嘅護理就少之又少，到真係要見人時，就變咗唔見得人，所以我覺得護手市場大有可為，特別係啲準新娘，公布婚訊時見到阿貓阿狗都想晒吓自己隻求婚戒指，但因為平時冇護理，玉手皺紋滿布，都唔敢將幸福公開！」
爭住捧場
咁又真係幾慘喎！小雪話：「到真正婚禮時隻結婚戒指子又會加倍貴重，新娘子呢個時候一定更想炫耀一下，加上賓客眾多，無論男家或女家嘅親友嚟到，禮貌上都會同新娘子握吓手，新娘隻手從外觀到摸上手都非常重要，所以我覺得搞一間專門為準新娘做手部護理嘅公司，真係有得諗，至於有冇辦法短期內令準新娘雙手脫胎換骨，我當然有秘方啦！唔信睇吓我，由頭到腳皮光肉滑，搵我做生招牌就最啱不過！實有大把人爭住捧場呀！」
小雪Profile
年齡：20歲
三圍：34-23-34
撰文：小德
攝影：阿昌