立法會工務小組委員會早前審議政府擴建將軍澳堆填區建議時，主席盧偉國（WK）就拒絕處理議員范國威（Gary）提出嘅「拉布」式修訂，變相「剪布」令政府建議得以通過提交財務委員會。不過，Gary疑似心有不甘，早前仲去信WK，要求WK就裁決作出書面陳詞同跟進，實行咬住WK唔放。工務小組今朝又開會審議政府喺石鼓洲興建焚化爐嘅方案，唔知Gary會否再向WK出招呢？
WK在上周三工務小組「剪布」，仲話參考咗主席曾鈺成在大會對議員提出嘅預算案撥款修訂作出嘅裁決。Gary上周三就去信畀WK，話曾鈺成所作嘅裁決係根據立法會《議事規則》，但有關條文並不規限工務小組處理議員就政府工務工程項目建議所提出的議案，要求WK作書面陳詞解釋。而另一位議員張超雄亦去信WK，聲稱工務小組冇話唔准動議瑣屑無聊或者無意義嘅修訂。
面對多方夾擊，WK尋日就覆信畀Gary，認為無論立法會主席定係佢作為小組委員會主席，都係有同樣嘅責任去確保會議有秩序、公平同正當咁進行，又話Gary上周三提出嘅修訂除咗佔用委員會嘅會議時間外，並冇達致同委員會職能有合理關連嘅目的，如果當日批准Gary提出修訂，只會令委員會程序延長，唔能夠妥善行使同履行職責喎。