政情：侍產假加碼 政府拖字訣
男士侍產假立法係勞資雙方嘅最新戰場，立法會有關法案委員會尋日開會繼續審議呢條法例，正當大家以為實有火花時，點知商界陣營冇乜聲氣，反而工聯會、工黨就同氣連枝，齊齊要求將男士侍產假由三日增至七日。不過，政府竟然話七日侍產假係違反勞工顧問委員會（勞顧會）共識，如果議員提出修訂，就要將條法例攞番去勞顧會再商討，未必趕及今年底三讀通過喎。政府將勞顧會當做關卡，被批評拖得就拖。
三日擬修訂至七日
立法會議員有權在法例審議過程中提出修訂，但當尋日《2014年僱傭（修訂）條例草案》開會時，工聯會鄧家彪等議員就提出，三日侍產假都未必足夠，有可能會提出修訂加多幾日。唔知係政府係低估定係輕視議員，尋日負責答問題係勞工處助理處長許柏坤，聽見議員話要修訂侍產假後，即刻話要返去同勞顧會商討，因為勞顧會之前嘅共識係三日侍產假，仲話未有共識前，唔會將法例攞上立法會恢復二讀。
工黨李卓人聽到即時火滾，話勞顧會有三日侍產假共識，但勞顧會只係諮詢架構，同立法會係兩個唔同權力嘅組織，唔明白點解議員作出修訂，政府要過問勞顧會，質疑政府係咪想搵勞顧會做擋箭牌。之後鄧家彪都加入圍剿行列，事關呢條法例本來有望年底三讀通過，但政府如果又交番個波畀勞顧會，咁睇怕今年一定冇機會立法，所以佢不停追問政府如果勞顧會唔認同有七日侍產假，咁政府係咪撤回法例先？
官員縮沙變錄音機
眼見勢色唔對，回答問題嘅許柏坤開始唔敢講太多，一味話會同勞顧會商討先，現階段唔敢下太多判斷喎。最尾連法案委員會主席梁繼昌都睇唔過眼，話如果冇授權就唔好亂答啦！結果兩個鐘頭會議內，就係你一言我一語咁過去。講咗咁耐，大家係咪發現成個會點解一面倒？梗係啦，成個會得一名議員為資方發聲，就係紡織及製衣界鍾國斌囉。其實男士侍產假影響好多階層，奉勸勞工及福利局局長張建宗唔好只係掛住買樓，小心搞出個大頭佛呀！