中環出更：唐唐11歲識睇馬 嚇壞阿爸
前政務司司長唐英年（唐唐）係愛酒、愛馬之人已經廣為人知，但近日出版、講述上海大家族唐氏嘅書籍《百年毗陵唐氏》就透露，原來唐唐早喺十一歲、未夠秤就已經對跑馬有濃厚興趣，但佢爸爸就怕佢會沉迷落去，以身作則唔再去馬場。
唐父身教 唔再入馬場
唐唐係毗陵唐氏第二十一世孫，唐老太唐尤淑圻接受該書作者訪問時坦言「身教重於言教」，仔女出息係源於良好家風，舉例唐唐十一歲時，有日唐唐爸爸唐翔千去完馬場返屋企，一入家門就被唐唐追問：「爹爹，今日你養嘅馬跑唔出，係因為馬姿唔好」。唐翔千一聽就呆咗，心諗「點解佢會咁熟悉？」佢先至警覺到原來自己去馬場時，唐唐就伏喺電視機前睇跑馬，所以從此唐翔千就唔再去馬場嘞。
唐老太又細數當年家教甚嚴，好似佢會放一把大間尺喺做功課嘅圓枱，但唔係用嚟體罰。唐唐四兄弟姊妹邊個分心或做功課唔認真，唐老太就會用尺拍枱，嚇吓佢哋。直至仔女到美國留學，因為根在中國，寫信返屋企都要一直用中文，就算話唔記得咗中文，都要佢哋寫，佢改完再寄返畀佢哋，所以唐老太好自豪話，仔女仲記得點用中文。
卓妮