中環出更：大師級展覽 名人賞名畫
邊個話香港係文化沙漠？藝術展覽一浪接一浪，「藝育菁英」計劃聯同「雲峰畫苑」日前喺中環大會堂舉辦咗個水墨畫展覽。今次展出超過六十幅包括國學大師饒宗頤、著名畫家王無邪及司徒乃鍾等作品，吸引好多對水墨畫有興趣嘅名人到場觀賞，除咗愛好藝術的民政事務局副局長許曉暉（Florence）現身外，愛好速寫嘅前立法會議員劉秀成（Patrick）都對畫作甚感興趣。
今次展覽只係短短七日，但就有好多都係大師級作品。卓妮於首展當日就見到藝育菁英組委會主席方黃吉雯（小吉）充當導賞員，帶住Florence觀賞畫作，期間Florence睇得好入神，並細心欣賞大師畫作技巧。小吉就話，好開心好多大師都熱心培育年輕人，下半年佢哋計劃邀請十二位大師於饒宗頤文化館輪流教授水墨畫，而當日就已經有七至八位藝術家答應咗喇。
「鑑賞能力 與生俱來」
講到挑選作品嘅標準，雲峰畫苑創辦人郭浩滿話，現時好多作品唔靚都賣得咁貴，係啲人覺得投資證券空間不大，就轉投藝術品，逐漸形成一種風氣，但好多時高價買入後根本冇人承接，所以佢哋挑選藏品一定要考慮其風格、技術難度及繪畫用意。佢又話，好多人以為自己唔識欣賞藝術，但其實鑑賞能力係與生俱來，只要畫作要用錢買，喺一堆作品之中，九成人都會睇中同一樣作品。
卓妮同場仲見到畫家朱楚珠（Nancy）同建築師Patrick，二人都教過繪畫，Nancy對學生冇咩要求，話最好係一張白紙添，更加易教。Patrick最耍家係速寫，佢不時教人畫建築物，並會隨身帶備畫簿同水筆，一見到特別建築物就立即速寫記低。
卓妮